Birqatar ıspan basylymdarynyń jazýynsha, fransııalyq jattyqtyrýshy jaz mezgilinde Keılor Navas, Teo Ernandes, Ashraf Hakımı, Markos Lorente, Danı Sebalos, Mateo Kovachıch, Garet Beıl jáne Borha Maıoraldardy transferge shyǵarýǵa qulyqty kórinedi.
Aıta keteıik, buǵan deıin BAQ betterinde Isko «Manchester Sıtıge», Ronaldý bolsa «Manchester Iýnaıted» komandasyna barýy múmkin degen aqparat taraǵan bolatyn.
Habıb pen Fergıýson kezdesýi ótpeıtin boldy
UFC-diń jeńil salmaqtaǵy ýaqytsha álem chempıony Tonı Fergıýson men reseılik Habıb Nýrmagomedov arasyndaǵy jekpe-jek osymen tórtinshi ret keıinge qaldyryldy.
2015 jyly Habıb jattyǵý barysynda jaraqat alyp, aıqasty keıinge shegergen. Al 2016 jyly Tonıdiń jaraqatyna baılanysty jekpe-jek ótpeı qaldy. 2017 jyly eki sportshy qaıta kezdesetin bolyp kelisilgen. Alaıda Habıb jekpe-jekke az ýaqyt qalǵanda salmaq qýamyn dep aýrýhanadan bir-aq shyqty. Bıylǵy kezek Tonıǵa qaıta keldi.
«Bul joly esh aqtalǵym kelmeıdi. Barlyq jankúıerden, UFC ókilderinen, Habıbten jáne jattyqtyrýshylarym men seriktesterimnen keshirim suraımyn. Bizdi ne qyrsyq shalǵanyn bilmeımin, biraq túbi jaqsy bolatynyna senimdimin», deıdi.
Lýkas pen Pakıao Malaızııada aıqasady
Argentınalyq boksshy Lýkas Mattısseniń (39-4, 36 KO) promoýteri Oskar De La Hoııa (Golden Boy Promotions) 14 shildede Mattısse men fılıppındik ańyz boksshy Mennı Pakıao (59-7-2, 38 KO) Malaızııada WBA beldigi úshin jekpe-jek ótkizetinin habarlady.
Bul aqparatty Pakıaonyń ózi de rastady: «Jekpe-jekti uıymdastyrý úshin kelissóz qıynǵa soqqan joq. Lýkas Mattıssege qarsy kezdesýge shyǵyp, álem chempıony ataǵyn ıelengenshe asyqpyn. Sondaı-aq Pakıao úlken boksqa qaıta oralǵanyn aıtqym keledi». Pakıaonyń keńesshisi Maıkl Konchtyń aıtýynsha, fılıppındik boksshyny Mattıssege qarsy jekpe-jekke Freddı Roých daıyndamaıdy. «Bul Pakıaonyń sheshimi. Ol maǵan aldaǵy aıqasqa Býboı Fernandes baptaıtynyn aıtty».
Qaqpada – býhgalter
Kásibı sportqa 30-dan asqan shaǵynda kelý árkimniń qolynan kele bermeıtin is. Alaıda AQSh-ta 36 jastaǵy azamat onyń da múmkin ekenin kórsetti. Búginge deıin býhgalter qyzmetin atqaryp kelgen Skott Foster Ulttyq hokkeı lıgasynda «Chıkago Blekhoks» – «Vınnıpeg Djets» oıynynda muz aıdynǵa shyǵyp, kezdesýdiń basty qaharmanyna aınaldy.
«Blekhokstyń» negizgi qaqpashysy Anton Forsberg match aldyndaǵy daıyndyqta jaraqat alyp qalsa, Kollın Dellı kezdesýdiń úshinshi kezeńinde oıyndy jalǵastyra almaıtynyn aıtqan. Sóıtip komandanyń úshinshi qaqpashysy Skott Foster aıdynǵa shyǵyp, 14 mınýt ótkizdi. Bir qyzyǵy, ol qaqpaǵa baǵyttalǵan jeti soqqynyń jeteýin de qaıtara bilgen. Nátıjesinde, Foster Ulttyq hokkeı lıgasynyń sol kúngi úzdik oıynshysy atandy.
«Komanda jeıdesin kıip otyrǵanymda ne qoıyp, ne istep otyrǵanymdy túsinbedim. Odan keıingisi esimde joq. Hokkeı oıynynda qaqpashy bolý armanym edi, mine armanym oryndaldy. Endi bul týraly dostaryma, otbasyma maqtanyshpen aıta alamyn. Negizi men býhgaltermin. Oıyn bastalardan bir-eki saǵat buryn keńsede kompıýterimniń aldynda jumys istep otyrǵanmyn», deıdi Foster. Kezdesýde «Chıkago Blekhoks» 6:2 esebimen jeńiske jetti.
Daıyndaǵan Álı BITО́RE,
«Egemen Qazaqstan»
